環球影城｜環球影城正式確認進駐英國！
各位環球影城擁躉注意啦！環球影城嘅版圖再擴展，今次就輪到英國啦！2023年12月，有人發現NBC環球集團收購咗英國一大片土地，外界已經有傳聞會起主題公園，直到今日終於正式確認啦！英國首相正式宣布，未來會喺英國興建歐洲首個環球影城，樂園預計佔地476英畝，相當於360個標準足球場咁大，比大阪環球影城大4倍。選址係倫敦以北約60英里嘅貝德福，下年就會開始動工，目標喺2031年正式開放，全年無休，對住喺歐洲嘅朋友嚟講，相信真係一個天大嘅好消息。根據環球影城嘅計劃，樂園會有幾個沉浸式主題區域，結合先進嘅遊樂設施同高科技元素，仲計劃咗起一間有500間房嘅度假酒店，內置高級餐飲、購物同娛樂設施等等，冇門票都可以光顧，相信係一個可以住足幾日嘅度假勝地！雖然依家未有正式公開主題區嘅詳情，但最新消息指《回到未來》、《侏羅紀公園》、《迷你兵團》、柏靈頓熊、《007》、《魔戒》都會喺英國環球影城登場。另外好多人都推測《哈利波特》都會出現，不過目前未有相關消息。各位粉絲，準備好你嘅行李，未來嘅英國之旅，就多咗一個必去嘅夢幻景點啦！
▲ 根據環球影城最新公開嘅計劃圖，樂園會設有一個好大嘅中心水池，周圍有多個過山車同埋水上設施。另外從圖可見，大部分景點都會係室內設施，意味住不論係英國嘅風雨天氣，遊客都可以盡情玩足全日，感受沉浸式嘅娛樂體驗。
▲ 樂園選址貝德福，貝德福交通便利，喺倫敦搭火車大約一小時就到，令呢個地方成為一個理想嘅旅遊熱點。
▲ 貝德福呢個地方可能對部分人嚟講比較陌生，但其實佢係英格蘭中央位置嘅歷史名城，擁有獨特嘅英倫小鎮風情。
▲ 好多粉絲都推測哈利波特呢個IP應該係必不可少嘅重頭戲，畢竟哈利波特嘅故事背景就係源自英國，今次喺英國打造主題樂園，喺地利同文化上都係絕對嘅主場優勢，不過宣傳圖中未見有哈利波特城堡，所以相關詳情仲要有待確認。
文字：香港人遊香港
The post英國好去處：【環球影城正式確認進駐英國！規模比日本大4倍！超大型水池+全年無休+設立免費區域】appeared first on香港人遊香港.
