荔枝角居酒屋｜將日本全國人氣地道料理搬到港
麥當勞就將全球最Top既Menu帶到港，而呢間位於荔枝角的居酒屋大玩日本全國Menu，將日本各地最人氣嘅地道料理搬到港，一樣將最好食嘅留比大家！呢次餐廳以「B-1 美食大賞」為靈感，「B-1 美食大賞」係日本每年一度嘅美食盛會，目的係係推廣地方品牌（BRAND）同振興地方經濟，所以活動集合全日本唔同地區嘅 B 級美食（用普通食材製作但又好味嘅平民美食），讓人一次過嘗遍全國滋味。特別係，「B-1」入面嘅「B」，並唔係指「B 級」，而係指地方品牌，香港首次帶餐廳將呢個概念帶來，所以絕對值得一試！有興趣朋友即睇推介菜式！
▲東京三文魚籽/吞拿魚蓉/海膽最中餅($58/$58/時價)：呢個源自江戶時代嘅傳統美食最中餅，將薄脆嘅餅皮結合鹹鮮嘅餡料，做到鹹點甜點都能滿足！三文魚籽爆珠口感、吞拿魚蓉細膩香滑，或者奢華海膽嘅濃郁鮮味，全部都係必試之選。
▲名古屋鰻魚飯三食($108)：喺名古屋，鰻魚飯係一種藝術！「三食」食法讓你一次過享受三種唔同口感
▲廣島牛腸天婦羅($88)：呢道將內臟升級為高級料理嘅天婦羅，源於廣島福島町，由內臟嘅鮮味結合香脆嘅炸衣，將平凡食材變成難忘嘅味覺享受！一啖咬落，外脆內嫩，係一道好有層次感嘅小食。
▲福岡明太子芝士豚肉天婦羅($78)：福岡嘅明太子歷史悠久，仲係用辣醬醃製，香辣滋味令人上癮！加埋濃郁嘅芝士同嫩滑豬肉，再炸到外皮金黃酥脆，一嚐即愛！
▲北海道 焗2年越冬熟成馬鈴薯($78)：兩年嘅寒冬熟成，令呢款馬鈴薯嘅甜度高達一般嘅17倍，入口即化嘅甜香，再配上大大塊牛油，真係令人一試難忘！
▲新潟 鯛魚笹壽司($48)：竹葉包裹住嘅鯛魚壽司，唔單止外觀吸引，仲保留住鮮味同新鮮感，完美演繹咗日本嘅飲食智慧。
▲北海道 漁師町海鮮野菜鏘鏘燒($148)：新鮮三文魚、時令蔬菜加埋味噌，喺鐵板上燒製出獨特風味，仲有「鏘！鏘！」嘅煮食聲效，感官同味覺雙重享受！
▲岩手 盛岡冷麵($98)：韓式風味融合日本特色，配上清爽嘅牛骨湯底同泡菜，呢個係夏天降溫嘅必選！
▲千葉 花生味噌唐揚炸雞($108)：千葉嘅花生味噌配埋酥脆炸雞，甜鹹交織嘅味道，令人忍唔住一塊接一塊！
▲京都鱧魚茄子天婦羅 梅肉蘿蔔泥($118)：鱧魚，京都夏天嘅代表性食材！清淡柔滑嘅魚肉，配上炸得香脆嘅茄子，再加埋清新解膩嘅梅肉蘿蔔泥，食完真係覺得夏天都清爽咗！
▲愛媛宇和島鯛魚太飯($128)：愛媛出品嘅真鯛魚，配搭特製醬油、生蛋、芝麻、蔥花，鋪喺熱辣辣嘅白飯上，入口即化，鮮味爆棚！傳說呢道菜由海盜發明，充滿冒險故事嘅美味，你點可以錯過？
▲福岡爐端燒豬蹄($88)：豬蹄用備長炭慢慢燒至外脆內嫩，豐富膠質滿滿，啖啖香濃，食完啲皮膚都感覺彈滑啲！
▲大分琉球醬漬刺身($118)：來自大分嘅經典料理，將新鮮魚片浸泡喺甜醬油、味醂、清酒同芝麻嘅特製醬汁入面，鹹甜交融，鮮味滿分！
▲冰結檸檬塔沙瓦($88)：：呢杯人氣飲品係日本社交平台上瘋傳嘅打卡聖品！將檸檬片層層堆疊，冷凍成一個高塔，仲會隨飲品融化釋出清新滋味～每日第一位點呢杯飲品嘅客人，更可以免費升級至35cm 加長版！影相打卡，吸引力爆燈！
鵜舞
地址：荔枝角長義街 9 號 D2 Place 一期地下 2 號舖
電話：27438011
營業時間：12:00-14:30；17:30-22:30
文字：香港人遊香港
The post荔枝角美食：【將日本全國人氣地道料理搬到港！東京最中餅＋廣島牛腸天婦羅+福岡明太子芝士豚肉天婦羅】- 鵜舞appeared first on香港人遊香港.
